நம்பிக்கை...

நம்பிக்கையோடு
கரங்களை உயர்த்து
முகில்கள் தட்டுப்படும்.

முயற்சிக்குப் பின்
உன் பாதங்களின்
கீழே பார்
முகடுகள் தென்படும்.

தெரிந்த கதை

இரத்தம் இல்லாமல்
வெளுத்துப் போன
சிவந்த இதழ்கள்

அழகாக சிரித்தது
மனம் பரித்தது
மறந்தும் ஆசையோடு
தீண்டிப் பார்க்க
தோன்றுபவர்கள்
இதழ்களை தடவி
கீழே விரல்கள்
நீண்டால் நிச்சயமாக
அவர்களுக்கு கிடைக்கும்
குருதியுடன் வலி.
ஆம்
அது முட்களோடு
கூடிய வெள்ளை ரோஜா.

புறா ஒன்று காதலித்தது
அந்த வெள்ளை ரோஜாவை

வெள்ளை ரோஜாவின்
மௌனத்தோடு
காலங்கள் கரைந்தன.

ஒரு தருணத்தில்
"ஏன்
இந்த மௌனம்
உன் மனம்
கவர்ந்தது வேறு
ஏதாகிலும் உண்டா
கூறிவிடு
என் மனதை
மூடி வைக்கிறேன் "
என்ற கேள்விக்கு
மௌனம் கலைத்தது
வெள்ளை ரோஜா.

நிச்சயமாக ஏற்றுக்கொள்கிறேன்
உன் காதலை
என் ஆசை
நிறைவேறட்டும்.

ஆச்சரியமுடன் பார்த்தது புறா.

ஆம்
நான்
சிவப்பாக வேண்டும்
கூறியது வெள்ளை ரோஜா

நாட்கள் நடந்தன
வாரங்கள்
மாதங்கள் ஆகியது

முடிவுக்கு வந்த புறா
உறுதியோடு
ரோஜாவின் முட்களில்
மெத்தையென புரள
குருதி பெருகி
வெள்ளை ரோஜா
கொஞ்சம் கொஞ்சமாக
மாறிக்கொண்டிருந்து
சிவப்பாக.

ரோஜாவிற்கு
ஆனந்தம்
முழுவதும்
சிவப்பாக
மாறியதால்

பாவம்
உரமாகிப் போனது
புறா